நாகர்கோவில் வடக்கு அருள்மிகு முருகையா தேவஸ்தானத்தில் கடந்த 23-10-2015 வெள்ளிக்கிழமையன்று மணடலாபிஷேக பூர்த்தி (சங்காபிஷேகம்) விழா வெகு விமரிசையாக நடைபெற்றுள்ளது.இந்நிகழ்வில் வள்ளி தேவசேனா சமேத முருகையாவுக்கு 1008 சங்காபிஷேகம் நடைபெற்று அதனைத் தொடர்ந்து விசேட பூசாராதனை இடம்பெற்றது. தொடர்ந்து  நடைபெற்ற அன்னதான நிகழ்வுடன் பகல் விழா நிறைவுபெற்றது.

மாலை நிகழ்வாக திருக்கல்யாண நிகழ்வு  மிகச்சிறப்பாக நடைபெற்றது. தொடர்ந்து எம்பெருமான் பூந்தண்டிகையில் வெளிவீதி வலம்வரும் திருவிழா விசேட நாதஸ்வர கச்சேரியுடன் நடைபெற்றது.

அதனைத் தொடர்ந்து திருவூஞ்சல் ஆட்டும் நிகழ்வு ஆலய ஓதுவார்களின் பாடல் இசையுடன் சிறப்பாக இடம்பெற்றது.

இந்நிகழ்வின் பின்னர் ஆலய மண்டபத்தில் தொண்டர்களைக் கௌரவிக்கும் நிகழ்வு நடைபெற்றதுடன் இரவு நிகழ்ச்சி நிறைவுபெற்றது.

இந்நிகழ்வில் பெருந்தொகையான அடியார்கள் கலந்து கொண்டு எம்பெருமானைத் தரிசித்தனர்.

விசேட குறிப்பு

கடந்த 09-09-2015 புதன்கிழமையன்று நடைபெற்ற கும்பாபிஷேக விழாவுடன்  தொடர்ந்து 43 நாட்களாக மண்டலாபிஷேகம் நடைபெற்று, இறுதிநாள்  நிகழ்வான மண்டலாபிஷேக பூர்த்தி விழா (சங்காபிஷேகம்) கடந்த 23.10.2015 வெள்ளிக்கிழமை நிறைவுபெற்றுள்ளது.

இந்த மகத்தான கும்பாபிஷேக விழாவை சிறப்பாக நடாத்துவதற்கும் திருப்பணி வேலைகளுக்கும்  நிதி நன்கொடைகளை அள்ளி வழங்கி ஒத்துழைப்பு வழங்கிய உள்ளூர் மற்றும் வெளிநாடுகளில் வசிக்கும் எம்பெருமான் அடியார்களுக்கும், புலம்பெயர் நாடுகளில் நிதிகளை சேகரித்து உதவி புரிந்த நிதிப் பொறுப்பாளர்களுக்கும் கடந்த காலங்களில் ஆலயத் திருப்பணிகளில் தனித்து வேலைகளை பொறுப்பேற்று செவ்வனே நிறைவேற்றிய  அடியார்களுக்கும் நிதி நன்கொடைகளை வழங்கி உதவியளித்த  எம்பெருமான் புலம்பெயர் மெய்யடியார்களுக்கும், கும்பாபிஷேக தினத்தன்று தென்னிந்திய இசைக்கச்சேரி நிகழ்வை ஏற்பாடு செய்து விழாவைச் சிறப்பித்த மெய்யன்பர்களுக்கும், கும்பாபிஷேக நிகழ்வு  தொடங்கி சங்காபிஷேகம் முடியும் வரையுள்ள காலங்களில் வீதித் துப்புரவுப் பணிகள், மடம் அமைத்த பணிகள் அடங்கலாக சகல வழிகளிலும் நிர்வாக சபையினருடன் இரவு பகல் பாராது ஒத்துழைப்பு வழங்கிய ஆண்,பெண் தொண்டர்களுக்கும், கிரியைகளை செவ்வனே நடாத்திய பிரதம சிவாச்சாரியார் ச.மு பாஸ்கரரவிக் குருக்கள் தலைமையிலான குருமார்களுக்கும் மற்றும் ஆலய கட்டிட வேலை, கூரைவேலை, வர்ணப்பூச்சு வேலை, சிற்ப வேலை, கதவு வேலைகள், கேற் வேலை மின் இணைப்பு வேலை ஆகியவற்றை நேர்த்தியாக செய்து முடித்த ஆசாரிமார்களுக்கும், பல வழிகளிலும் ஒத்துழைப்பு நல்கிய எமது பகுதி உதவி அரசாங்க அதிபர் மற்றும் கலாசார அதிகாரிகளுக்கும், பாதுகாப்பு கடமைகளைில் அவ்வப்போது ஈடுபட்டு உதவி வழங்கிய காவல்துறையினருக்கும், ஆலய வளர்ச்சியில் அக்கறையாக செயற்பட்ட பொறுப்பாளருக்கும்,  இன்னும் எத்தனையோ வழிகளில் உதவிய அன்பர்களுக்கும் எமது மனமார்ந்த நன்றியையும் பாராட்டுதலையும் தெரிவித்துக் கொள்வதுடன் சகல அடியவர்களுக்கும் எம்பெருமான் திருவருள் கடாட்சம் கிடைக்க வேண்டுமென்று பிரார்த்திக்கின்றோம்.

நிகழ்வுக்குரிய படங்கள் சிலவற்றை இணைத்துள்ளோம்.